Ipa-autopsy aron masuta gi-rape ba

Gidala na ang lawas ni Jocelyn Samillon, 21, sa Regional PNP Forensic Unit 7 aron ipaubos sa autopsy ug masayran unsay gikamatyan.

Aron usab masuta kon gilugos ba kini sa suspek nga si Jimboy Pasacan nga ila ra usab nga kabanay.

Ang inahan ni Jocelyn nga si Gemma Samillon nagkanayon nga pasado alas 9 sa Dominggo sa gabii nilakaw ang iyang anak aron mo-disco sa Barangay Anopog subay sa kapistahan sa maong lugar.

Uban niini si Jimboy ug ang igsuong babaye sa suspek hinungdan nga nisalig ra usab siya.

Apan nangatingala na sila kay nabuntag na lang wala pa makauli ang iyang anak.

Nagtuo sila nga didto ra natulog sa iyang apuhan ang biktima, apan sa ilang pagsubay wala didto.

Di na usab ma-contact ang cellphone niini.

Tungod sa kabalaka nagpa blotter na sila sa barangay ug nihangyo sa mga opisyal sa pagpangita niini.

Tuod man pagka alas 11 sa buntag sa Lunes napalgan kini sa kilid sa lim-aw sa tubig nga patay na.

“Gipa blotter nako sa barangay nya nag koan og tanod ang kapitan didto kay ako ra man sad nang ig-agaw. Mao to nagpatabang siya’g tanod para pangita. Karon nakit-an naman namo gitambog sa lugot, gitabunan siya sa unas. Luoy tawon kaayo,” matod ni Samillon.

Dali nga nadakpan sa kapulisan si Pasacan sa Barangay Bitoon, bukirang dapit sa lungsod sa Dumanjug, human siya ang gitudlo nga maoy katapusang nakit-an nga kauban sa biktima sa pagpamauli.

MIANGKON

Giangkon ni Pasacan ang krimen ug iyang gibutyag nga igo ra siya nga nihangyo nga makighilawas.

Apan sa dihang iya nang hubuon ang short pants sa biktima, nibalibad na kini tungod kay ig-agaw ra sila.

Dinhi na siya nasuko ug iyang gisukmag sa makatulo ka mga higayon ang kuto-kuto nga maoy nakaingon nga nakuyapan kini.

Human niya mapahimusli ang biktima, iya kining gitiwasan sa pagtuok sa liog ug gihagbong sa lim-aw dayong tabon sa mga unas sa saging.

Sa interview sa sibyaanang dyHP, nangayo’g pasaylo ang suspek sa pamilya sa biktima.

Apan matod niSamillon nga dili na sila makapasaylo ug gusto sila nga madugta kini sa bilanggoan.

“Salbahis kaayo ka, Boy. Gipakaon paka namo, maayo gyung ____sad na siya uy. Nangayo pa siyag pasaylo. Hilasa ana niya no, dili gyud mi makapasaylo nga kinabuhi man na iyang gikalas,” matod ni Samillon.

Giangkon ni Samillon nga duna nay record sa ilang barangay ang suspek tungod kay mao kini ang gitumbok nga manaka sa kabalayan aron mangawat.

Dili siya makatuo nga mabuhat sa suspek ang pagpatay sa iyang anak kay giila na nila kini nga sakop sa pamilya.

Gani didto kini mokaon ug kauban usab sa trabaho sa iyang anak nga lalaki.

Tungod sa dali nga pagkasikop sa suspek, gidayeg sa Police Regional Office 7 ang kapulisan sa lungsod sa Pinamungajan nga wala ra mag 24 oras nasulbad ang krimen.

Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, nga giandam na ang mga ebedensya aron mapasaka na ang kasong rape with homicide.