HINGPIT nang gitugyan ni Janeverly Catadman, taga Dakbayan sa Naga kinsa unang niangkon nga siya ang tag-iya sa iro nga si ‘patpat’ o ‘winter’ ngadto sa nagpaila nga tinuod nga tag-iya nga si Charie Maynigo, nga taga Barangay Yati, Lungsod sa Liloan human sila magkaatubang sa DyHP RMN CEBU atol sa programa ni Atty. Ruphil Bañoc sa Lunes, Hulyo 7, 2025.
Kini human nagkahusay ang duha ka habig nga ang tinuod nga tag-iya sa maong iro nga dunay breed nga Shih Tzu mao si Charie.
Tungod niini malinawon nga gitunol ni Jane ang maong iro subay sa gipakita nga ebidensya ni Charie nga iyaha gyud kining binuhi.
Kahinumdoman nga niadtong Hunyo 15, 2025, gipanawagan ni Charie sa iyang Facebook page nga nawagtang ang iyang iro nga si Winter nga nagdala pa og higot.
Apan nianang pagkagabii dunay nakakita niini sa Lungsod sa Liloan ug gi-post sab sa usa ka Facebook page diin dali nga gi-claim ni Jane nga iyaha ang maong iro.
Si Jane nga taga Dakbayan sa Naga nibutyag nga niadtong Mayo nawala sab ang iyang iro ug dako ang iyang pagtuo nga ang nakit-an sa Liloan mao na kini.
Ang nakakita nga nakabasa sa pag-angkon ni Jane walay duhaduha nga nihatag ngadto kaniya sa pagtuo nga iyaha gyud kini.
Apan dunay nakapahibalo ni Charie nga gi-post si Winter sa usa ka page sa Facebook ug sa dihang iya kining gisusi gipahibalo siya sa nakakita nga iya na kining na-turnover sa tag-iya.
Dinhi na nisuway og contact si Charie kang Jane aron ipahibalo nga ang iyang giangkon nga iro iyaha ni nga nakabuhi niadtong Hunyo 15 apan wala motuo niini si Jane sanglit sigurado siya nga mao sab ni ang iyang nawala nga iro niadtong Mayo.
Hangtod nga nagkatinubagay na sila nga pulos nibuhi ug mga sakit nga pulong diha sa social media.
Nidangop na sa DyHP si Charie aron magpatabang nga makuha pagbalik ang ilang pinangga nga iro ug nipakita og mga ebidensya nga siya ang tinuod nga tag-iya niini.
Sa dihang gipakita na kini kaniya, gitupihan na ang iro nga girason ni Jane nga ila na kining gipa-groom.
Tuod man, giawhag sila sa DyHP nga mag-abot sa sibyaanan aron maklaro kon si kinsa gyud ang tag-iya sa maong iro ug positibo si Charie nga mao gyud kini si Winter apan hugot nga nangangkon si Jane nga mao kini si Patpat.
Sa dihang nakakita ang iro kang Charie ug sa anak niini, mikitiw-kitiw ang ikog sa iro ug daw sa nalipay. / AYB