Taliwala sa grabeng kainit sa kayo ug gubot nga palibot, duha ra ka importanteng butang ang gidali sa pagluwas ug pagkugos sa usa ka dalaga, ang iyang binuhing iro ug ang imahe sa Senior Santo Niño.
Kini ang nahitabo alas 4:00 sa kaadlawon sa Biyernes, Agusto 21, 2026, atol sa pag-ulbo sa dakong sunog sa Sityo Kiosko, Barangay Basak Pardo, Dakbayan sa Sugbo.
Si Rose Mary Danuco, 20, usa ka first-year Tourism student ug gitawag nga "furmom," nibutyag sa Superbalita Cebu nga gigakos gyud niya ang duha samtang nagdalidali og gawas sa ilang balay.
Matod ni Danuco, naandan na niyang matulog nga tapad si ‘Butter,’ ang iyang lima ka tuig nga binuhi.
Nipukaw kaniya ang iyang iyaan taliwala sa kasaba sa mga tawo. Apan imbes nga mga gamit ang unahon, si Butter ug ang imahen ang una niyang gikuha.
“Kalooy intawon og mahabilin. Mora na ni nakog anak,” matod ni Danuco.
Usa si Danuco sa daghang molupyo nga nawad-an og balay tungod sa maong sunog.
Apan bisan pa man sa maong trahedya, nagpasalamat gihapon siya nga luwas silang tanan lakip na ang iyang giisip nga anak. / JDG
