Malinawon ug hapsay nga natapos ang Ironman 70.3 Lapu-Lapu Cebu, nga walay gikataho nga dagkong insidente sa tibuok kalihokan sa international triathlon niadtong Dominggo, Agusto 10, 2025.
Matod ni Lt. Col. Christian Torres, spokesperson sa Lapu-Lapu City Police Office (LCPO), nga ang tibuok lumba, gikan sa 1.9-kilometer nga salom, 90-kilometer nga bike course, ngadto sa kataposang 21.1-kilometer nga dagan, nahimo nga walay mga kakulian.
Giingon niya nga ang mga tumatan-aw ug mga residente mituman usab sa mga lagda ug safety guidelines sa maong kalihokan, lakip na ang pagseguro nga ang mga binuhi nga hayop hiktan aron dili motabok sa rota sa lumba.
Apan, usa ra ka minor incident ang natala dihang usa ka partisipante ang aksidenteng nahulog sa iyang bike sa Barangay Agus.
Ang maong atleta nakaangkon og gagmay nga samad ug wala ra gidala sa tambalanan.
Usa ka partisipante usab ang gikataho nga nawad-an og panimuot sa run course, samtang laing usa ang nakasinati og susamang sitwasyon sa bike course apan nakapadayon sa pagbisekleta.
Sa kinatibuk-an, 800 ka mga personahe ang gipakatap aron masiguro ang seguridad ug kahapsay sa tibuok rota sa lumba.
Matud ni Torres nga epektibo ang pagdumala sa mga tawo, ug walay nadawat nga mga taho ang mga awtoridad mahitungod sa jaywalking o unruly behavior gikan sa mga tumatan-aw. / DPC