Sa iyang pagbalik gikan sa unom ka mga duwa nga pagpalta tungod sa iyang pagkaangol (sprained thumb), napangulohan dayon ni Kyrie Irving ang kadaugan sa Dallas Mavericks batok sa hosts Philadelphia 76ers, 118-102, ning Martes, Pebrero 6, 2024 (PH time) sa National Basketball Association (NBA).
Si Irving nimugna og 23 puntos, walo ka assists ug lima ka rebounds, niamot og 20 puntos si Josh Green samtang nidugang og 19 puntos si Luka Doncic.
Gawas kang Irving, nakapalta sab og mga duwa si Doncic ning maong season ug ang ilang panag-uban og balik nga himsog gikinahanglan kaayo sa Mavericks ning puntoha.
Sa kasamtangan, ang Mavericks naa sa ikawalong dapit sa Western Conference dala ang 27-23 nga rekord.
Ning 50 ka mga duwa sa Mavericks, sulod sa 23 lang ka mga higayon nga nagkadungan og duwa sila si Irving ug Doncic.
Sa nahabilin nilang 32 ka mga duwa sa regular season, nanghinaot ang Mavericks nga magpabiling himsog ang ilang duha ka superstars.
Ang 76ers padayong wala nakasulbad sa dakong haw-ang sa ilang puwersa tungod sa pagpadaplin sa kasamtangang MVP nga si Joe Embiid, kinsa nakatakdang operahan sa iyang wa nga tuhod sulod ning semanaha.
Ang 76ers adunay 4-11 nga rekord sa mga duwa nga wala si Embiid. Hinuon, anaa pa sa ikalimang dapit ang 76ers sa Eastern Conference dala ang 30-19 nga rekord.
Nagkumboya sila si Tobias Harris, Kelly Oubre Jr. ug Tyrese Maxey aron tapakan ang haw-ang nga nabiyaan ni Embiid apan sa gihapon ningsaler ang ilang paninguha.