Nakurat ang tag-iya sa mga manok igtatari nga nangahanaw na ang iyang mga binuhi sa batoganan niini, sa Sityo Tawog, Barangay Taloot, lungsod sa Argao, habagatang Sugbo.
Ang pagpangawat nahitabo mga ala 1 sa Lunes sa kaadlawon, Hunyo 10 , 2024 sigun sa gibutyag ni John Rey Camento nga gikahinabi sa SuperBalita Cebu.
Matod pa niya ang maong mga manok igtatari gipanag-iya sa iyang papa nga giandam na unta sa tari sa kapistahan sa ilang sityo karong Hunyo 13.
Apan gikawat na hinuon sa wa mailhing mga kawatan, apan nakita sa CCTV footage sa usa ka gasoline station sa maong dapit nga ang mga nangawat sakay sa motorsiklo.
Apan dili maklaro ang mga nawong ug plate number sa motorsiklo kay layo ra. / DVG