Nipirma og upat ka mga tuig nga contract extension nga nagbalor og $229 million si All-Star guard De’Aaron Fox sa San Antonio Spurs.
Nagkanayon si Fox nga dihang wala pa siya nagduwa sa National Basketball Association (NBA), usa siya ka fan sa Spurs hilabi na dihang nanghakot og kampyunato ang team niadtong 1999, 2003, 2005, 2007, ug 2014.
Karon, naghandom si Fox nga makabaton og titulo isip sakop sa Spurs hinungdan nga wala siya nagmakuli sa pagpirma og contract extensuon nga magtanggong kaniya sa team hangtod sa 2009-30 season.
Pareha ang pagbati sa Spurs ug ni Fox.
Tinguha sa Spurs nga makahulma og lig-ong puwersa nga pangulohan nila ni Fox ug All-Star center Victor Wembanyama.
“Just being able to be part of an organization like this ... you come in here and you feel that. You feel that in the environment. You feel that in the fans,” matod ni Fox nga napatik sa AP News.
“And then you go into the practice facility or you go into the arena and you see those banners hanging ... there’s nothing you can do besides try to build on that.”
Si Fox nasulod sa NBA isip 5th overall pick sa Sacramento Kings niadtong 2017 ug nahimo siyang usa sa labing mga sinaligan sa team.
Niadto lang Pebrero, 2025, si Fox nabalhin sa Spurs sa usa ka three-team deal.
Isip sakop sa Spurs, si Fox nag-average og 19.7 puntos ug 6.8 assists sulod lang sa 17 ka mga duwa sa niaging season.
Nakapalta si Fox sa katapusang 18 ka mga duwa sa Spurs sa season tungod sa angol sa usa sa iyang kumingking nga tudlo sa wa nga kamot , nga niagi og operasyon.
“What’ll be different going forward is fans will see me play with 10 fingers,” matod ni Fox.
Gawas nila ni Fox ug Wembanyama, ang Spurs magsalig sab og maayo ni Stephon Castle, Rookie of the Year sa niaging season, ug sa ilang 2nd overall pick sa niaging NBA Draft nga si Dylan Harper. / Gikan sa wires