GIKALUHAAN og malas ang isnatser sa pagtuo nga molampos sa iyang pagpanglabni og cellular phone sa usa ka pasahero og traysikol tungod kay wala makapadagan palayo ang suspek sakay sa iyang motorsiklo kay naabtan sa red traffic light.
Ang insedente nahitabo sa Barangay San Isidro, Dakbayan sa Talisay alas 9:00 sa buntag, Miyerkules, Hulyo 30, 2025.
Ang suspek giila nga si Rico Lawas, 30, ulitawo, taga Barangay Tungkop, Lungsod sa Minglanilla, gitanggong sa Talisay City Police Station.
Ang biktima nga gilabnihan giila nga si Karen Mae, 32, dalaga, taga Barangay Dumlog, Talisay nga sakay sa traysikol niadtong higayona.
Sa paghunong sa traysikol tungod sa red light, wala kabantay si Karen Mae nga gisundan siya sa suspek sakay sa motorsiklo kinsa nagpaniid nang daan ug kalit nga nilabni sa iyang selpon nga nagkantidad og P10,000 ug nisutoy pagpadagan sa motorsiklo palayo.
Ang biktima nakapangayo og panabang sa mga personnel sa City of Talisay – Traffic Operation Development Authority (CT-Toda) nga nag-atiman sa trapiko hinungdan nga nakapanawag ngadto sa ilang kauban sa unahan gamit ang two way radio aron sa pag-atang sa suspek.
Naabtan ang suspek atol sa red light ug nahibulong nganong gipanaog siya sa motorsiklo ug gidakop sa traffic enforcers.
Apan walay lusot si Lawas sa dihang positibo nga gitudlo sa biktima nga maoy nilabni sa iyang selpon nga nag-undak undak pa sa dihang gipusasan sa arresting officer.
Dali ngs nibawi sa iyang selpon ang biktima gikan sa suspek ug mapasalamaton siya sa mga CT-Toda personnel nga sila si Edsel Lebria, Precioso Geraldez, ug Daryl Rallos sa ilang dali nga aksiyon. / GPL
