NAKAKUHA og ISO/IEC 17025:2017 accreditation ang Metropolitan Cebu Water District (MCWD) Water Quality Laboratory, giisip nga dakong kalampusan sa ilang panaad sa pagpanalipod sa panglawas sa mga konsumidor dinhi sa Metro Cebu.
Kining certification nagpamatuod sa competence sa laboratoryo sa MCWD, impartiality, ug consistent operations.
Kini nagsiguro nga tukma ug kasaligan ang ilang mga resulta sa pagsulay ug pag-calibrate.
Gikumpirmar nga ang laboratoryo nagsunod sa internasyonal nga standard, quality, ug accuracy.
Gipahigayon ang seremonyas sa pagtunol sa accreditation certificate niadtong Hulyo 2, 2025, sa MCWD Water Quality Laboratory sa Talamban, Dakbayan sa Sugbo.
Nitambong ang mga representante sa Philippine Accreditation Bureau (PAB) sa Sugbo alang niining maong okasyon.
Sa iyang pakigpulong, si Laarni Joya, accreditation officer ug Trade and Industry Development Analyst sa PAB niingon nga ang kalampusan nagpakita sa lig-on nga pagpakabana sa MCWD sa kalidad, teknikal nga abilidad, ug padayon nga pagpalambo.
Ang mga resulta sa pagsulay sa laboratoryo kanunay nga makatuman, ug molabaw pa sa standard nga gitakda sa Philippine National Standards for Drinking Water.
Kining ISO accreditation dugang nga nagpamatuod sa estrikto nga pagsunod sa MCWD sa mga sumbanan sa kalidad ug nagsiguro nga ang tubig nga ilang gihatag luwas imnon. / PR