SUGDAN karong adlawa ang 32nd SBP Passerelle Basketball Tournament National Finals sa Cebu Coliseum.
Magkombati ang dekalidad nga batan-ong mga basketbolista gikan sa Luzon, Visayas ug Mindanao sa duha ka mga adlaw nga torneyo, nga gibahin sa SBP (12-Under) ug Passerelle (15-Under) categories.
Ang Visayas representahan sa Sacred Heart School- Ateneo de Cebu (SHS-AdC) nga maoy nagkampiyon sa SBP event sa rehiyon.
Ikaparang sa Sacred Heart ang back-to-back champion La Salle Greenhills sa Manila, Mindanao champion Ferndale International School sa Zamboanga, ug Luzon champion Berkeley School sa Baguio.
Ang morepresentar sa Visayas alanbg sa Passerelle division mao ang Hua Siong Collge sa Iloilo City.
Ikasangka sa Hua Siong College ang powerhouse San Beda College sa Manila, International School for Better Beginnins sa Lucena alang sa Luzon ug Holy Child School sa Davao City alang sa Mindanao.
Daghan na sab sikat nga mga baskebolista sa nasod sama nila ni Chris Tiu, Kiefer Ravena, Kobe Paras, Jeron Teng, ug LA Tenorio ang nakaduwa kaniadto ning maong torneyo. (RSC, ESL)