MGA duwa karon:
12:30 pm- UV batok UCLM (high school)
2:00 pm- USC batok SHS-AdC (high school)
3:30 pm- USJ-R batok USPF (college)
5:00 pm- UC batok SWU-Phinma (college)
Gipangsilutan ang mga magduduwa ug coaches nga nahilambigit sa karambola nga nahitabo atol sa duwa sa Hotel Fortuna/University of Cebu (UC) Baby Webmasters ug University of Southern Philippines-Foundation (USP-F) Baby Panthers niadtong Huwebes, Hunyo 20, sa Cebu Schools Athletic Foundation Inc. (Cesafi) 2019 Partner’s Cup high school division sa University of San Carlos-Main Gym.
Nagkanayon si Cesafi commissioner Felix Tiukinhoy Jr. nga tulo ka mga magduduwa ug duha ka coaches gikan sa duha ka mga tunghaan ang gipahamtangan og tagsa ka duwa nga suspensyon, multa nga P5,000 matag usa ug tulo ka mga oras nga community service.
Ang gipangsilutan mao sila si player Eldebrando Sevillejo ug coaching staff Gary Hortellano sa UC ug sila si forward Elnah Singson, guard Kyle Ochavo ug assistant coach Christian Bacus sa USPF.
Nahitabo ang kasamok sa nahabiling 20.2 segundos sa duwa diin mingdaog ang Baby Webmasters, 75-60.
Niadtong mga gutloa, nagkabanggaay sila si Sevillejo ug Singson sa tungatungang bahin sa korte ug mao na kini ang nakadugkat sa kasamok.
Parehong nanga-thrown out sila si Sevillejo ug Singson lakip na sila si Bacus ug Hortellano.
Si Ochavo wala ra unta’y apil sa kasamok apan gipahamtangan sab siya og samang silot gumikan kay natawagan kini og unsportsmanlike foul ug technical foul sa nahabiling 2:34 minutos.
Sa kombati sa college division niadtong Huwebes, gipangbuntog sa Cebu Landmasters-University of San Carlos (USC) Warriors ang Tough Gear-Cebu Institute of Technology University (CIT-U) Wildcats, 75-66.
Sa laing bahin, mobalik ang aksyon sa kompetisyon sa Cebu Coliseum sugod karong hapon.
Sa school division, magsangka sa premirong duwa ang ARQ Builders/University of the Visayas (UV) Baby Green Lancers ug University of Cebu-Lapu-Lapu Mandaue (UCLM) unya mosunod ang engkuwentro sa Cebu Landmasters/Sacred Heart School-Ateneo de Cebu Magis Eagles ug Cebu Elite/USC Baby Warriors.
Sa college division, magkombati USJ-R Jaguars batok USPF Panthers sa ikatulong duwa unya magpinaksitay sa main game ang Joemang’s Surplus/UC Baby Webmasters batok Southwestern University (SWU)-Phinma baby Cobras. (ESL)