Taliwala sa grabing pagpanghudlat, napugnit ra gihapon sa Alicia KSB Glass ang unang luna sa finals human sa kulbahinam nga kadaugan, 87-84, batok sa mga batan-ong Letran Knights sa katapusang adlaw sa elimination round sa 1st Zamboanga Sibugay Governor Ann K. Hofer Open Invitational basketball tournament sa Unibersidad de Zamboanga gym, Pebrero 18, 2023.
Dala ang 3-0 nga baraha, ang Alicia KSB Glass nga gibidahan sa mga Sugboanong magduduwa, mosakbang sa MPBL South Division champion Zamboanga Family Sardines sa championship match karong gabii, Dominggo, Pebrero 19, 2023.
Ang Sardines nisulod usab sa finals human nipatapsing sa BRT Basilan.
“Nindot ni kay lig-on sab ning atong kontra. Champion gyud na sila sa MPBL,” matod ni Alicia KSB headcoach Chelito Caro.
Ang Family Sardines, sama sa Alicia KSB Glass, aduna usay 3-0 nga baraha hangtod ning pagsulat.
Nakaposte og labaw ang Alicia, 54-47, sa pagsira sa first half, apan sa kalit lang nahudlat kini human mopabuto og dakong rally ang Knights nga nagpahak sa bintaha, 58-60.
Kini maoy nakapaaghat ni coach Caro sa pagpangayo og timeout aron organisahon og balik ang iyang mga batos.
Sa paghibalik sa aksiyon, si Jonel Bongangciso miduslit sa 10-0 run nga giduyogan nila ni Reed Juntilla ug import Landry Sanjo aron inaton og balik ang bintaha, 70-58.
Bisan pa niini, wa moisa sa ilang puting bandela ang Knights ug ang tulo ka tres maoy nakapasikit og balik sa duwa, 79-84, ug maoy naghatag og dakong hudlat sa Alicia.
Diha na naaninaw ang kadaugan human kalmado nga gipasulod ni Patrick Cabahug ang iyang running shot. (PAC)