Anak ni Lebron nag-recover

Nagpadayon sa recovery stage ang anak ni Lebron James nga si Bronny human nag cardiac arrest sa miaging semana atol sa workout sa University of Southern California (USC) Galen Center sa Estados Unidos.

Si Lebron James mismo ang nihatod sa balita nga ang iyang anak nagpahuway karon sa ilang panimalay human kini makagawas sa Cedars-Sinai Medical Center niadtong Biyernes, Hulyo 28.

Gidugang ni James, 38-anyos nga beterano, nga ang ilang tibuok pamilya kay luwas ra ug healthy.

Samtang nag-recover si Bronny, nagpadayon sa ilang praktis ang USC teammates niini alang sa 10-day exhibition tour sa Greece ug Crotia nga sugdan na sunod semana.

Ipaubos pa sa laing mga test si Bronny aron mahibaw-an ang hinungdan sa iyang cardiac arrest kay kondisyon unta kini isip usa ka elite nga college athlete.

Mahitabo ang cardiac arrest kon ang kasingkasing mokalit lang og hunong pagpitik tungod sa problema sa electrical activity.

Di man tuod kini common sa mga batan-on labi na sa 18-anyos sama ni Bronny, apan sudden cardiac arrest maoy leading cause of death sa young athletes sa Estados Unidos.

Wala pay dugang impormasyon nga gipagawas sa publiko may labot sa hinungdan sa cardiac arrest ni Bronny.

Si Bronny maoy ikaduhang high-profile USC basketball recruit nga nagka cardiac arrest sunod ni Vincent Iwuchuwku nga naigo pud sa cardiac arrest.

Hinuon nakabalik dayon ang 7-foot-1 nga Iwuchuwku human sa unom ka buwan.

Si Bronny maoy ikaunom nga McDonald’s All-American nga nisulod sa USC sukad nahimong coach si Andy Enfield niadtong 2013.

Tungod sa iyang dako nga social media following ug sikat nga pamilya, dako ang balor ni Bronny ug gi-estimate kini sa On3.com nga $6.3 milyunes.