Dili gamiton sa kanhi world champion Filipino Jerwin Ancajas ang rematch clause sa kontrata sa miagi niyang away diin nailog ni Argentine Fernando Martinez gikan kaniya ang International Boxing Federation (IBF) super flyweight title pinaagi sa unanimous decision.
Nagkanayon si Ancajas nga nakadesisyon siyang mosaka na lang og timbang gumikan kay maglisod na siya pagkuha sa super flyweight weight limit.
Sa interbyu sa GMA News Online, nagkanayon si Ancajas nga makita unta niya ang mga kumo ni Martinez ug nasayod siya sa iyang pagabuhaton apan dili na makaresponde og sakto ang iyang lawas.
Alang kang Ancajas, panahon na nga mosaka siya og timbang ug manamilit na siya sa super flyweight division diin sulod sab sa dugay nga panahon siyang naghari.
Sulod sab sa siyam ka mga higayon nadepensaan ni Ancajas ang iyang titulo una kini nailog ni Martinez.