MIPAKITA na sab sa iyang katakos ang beteranong Grand Master (GM) nga si Joey Antonio human siya nanghawod sa Cebu Executives and Professionals Chess Association (Cepca) Weekend— Engr. Alex Chua Online Super Blitz Tournament niadtong Septiyembre 13, 2020.
Si Antonio midominar sa torneyo pinaagi sa paghakot og 72 puntos aron ibulsa ang laing titulo human niya nadaog ang Jojo Dondon Super Blitz Tournament, duha ka mga semana ang nakalabay.
Mikuha sa ikaduhang puwesto mao si John Morazo sa Far Eastern University nga adunay 63 puntos samtang si National Master Rommel Ganzon mibulsa sa ikatulong luna nga adunay 57 puntos.
Si Sherwin Tiu sa Philippine Christian University ug John Michael Magpily sa Manila misulod sa Top 5 nga adunay iskor nga 54 ug 53 puntos.
Sa laing bahin, giharian ni Engineer Archie Garzon ang Prexy Jerry Arena Tournament sa susamang adlaw.
Si Garzon mi-iskor og 32 puntos aron dag-on ang online tournament nga gi-sponsoran ni Cepca president Engr. Jerry Maratas.
Misulod sa ikaduha ug ikatulo nga luna sila Michael Ventulan ug Sheila Khan Sepanton nga adunay 25 ug 22 puntos.
Si Nic Cuizon ug Laila Nadera mi-kompleto sa Top 5 nga adunay 19 ug 18 puntos.
Niadtong Septiyembre 12, 2020, si Reynaldo Flores mao ang midaog sa Cepca Blitz-Doc Leo and Vince Arena Tournament sa iskor nga 34.
Misulod sa Top 5 sila Eladio Lim III, Randy Cabuncal, Cristy Cabungcag ug Jonathan Canque.
Ang tulo ka mga torneyo gipaagi sa online chess-server nga lichess.org. (RSC)