Araneta VS. Thai

Araneta VS. Thai

Pamatud-an ni world-rated Christian Araneta nga usa siya sa labing maayong light flyweight fighters sa kalibutan sa iyang pagpakigbatok sa beteranong Thai boxer Jakrawut Majungoen ning Sabado, Abril 1, 2023, sa main event sa “Kumbati 15 – Battle of Mactan” sa Hoops Dome sa Lapu-Lapu City.

Taodtaod na sab nga wala nakaaway si Araneta apan grabe ang iyang pagpangandam alang ning awaya nga usa sa iyang mga agianan sa posibleng oportunidad alang sa world title fight sa ugma damlag.

Sa interbyu sa Sun.Star Cebu, giklaro sa trainer ni Araneta nga si Jinggoy Junco nga sakto sa preparasyon ug sparring ang iyang batos.

Masaligon si Junco nga modaog si Araneta apan dili lang gyud mokompiyansa bisan gamay.

Lakip sa mga gika-sparring ni Araneta mao sila si World Boxing Organization (WBO) minimumweight champion Melvin Jerusalem, Esneth Domingo ug three-division world champion Kosei Tanaka.

Si Araneta kasamtangang maoy No. 4 sa International Boxing Federation (IBF), No. 9 sa WBO, No. 11 sa World Boxing Association (WBA) ug No. 17 sa World Boxing Council (WBC).

Kon modaog si Araneta ning awaya, hayan modako ang iyang poruhan nga makaaway alang sa world title.

Si Araneta naggunit og 22-2, 17KOs nga rekord samtang si Majungoen adunay 42-3-2, 21 KOs nga baraha.

Mopakita sab og aksyon sa promosyon ang sumosulbong nga mga boksidor nga sila si Benny Cañete, Carlo Bacaro ug Pete Apolinar.

Si Cañete (7-1, 6 KOs) makigharong ni Renoel Pael (23-13-1, 12 KOs), makigbatok si Bacaro (10-0, 6 KOs) kang Ernesto Cagampang (4-3-1, 4 KOs) samtang makigsumbagay si Apolinar (16-4, 10 KOs) kang Reymond Empic (7-6-1, 3 KOs).

Mokompleto sa mga parisan mao ang tali nila ni Franco Serafica (9-1, 4 KOs) batok Marjon Piencenaves (6-5-1, 4 KOs), Jason Canoy (27-10-2, 19 KOs) batok Michael Adolofo (4-0, 2 KOs), Ramil Roda Jr. (1-0-2) batok Dariel Diamante (0-1-1), Maurino Agum (2-1, 1 KO) batok Kier Torregosa (2-2, 1 KO) ug Jhon Antonny Magos mabunyagan batok ni Michael Omallao (0-1). (EKA)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph