PADAYON ang pagbangon sa University of San Jose-Recoletos (USJ-R) Baby Jaguars ug ilang gipanglampornas ang Cebu Institute of Technology-University (CIT-U) Wild Kittens, 73-58, kagahapon sa 2019 Cebu Schools Athletic Foundation Inc. (CESAFI) High School Basketball Tournament sa Cebu Coliseum.
Human nila nasugdan ang season og upat ka sunodsunod nga kapildihan, ang Baby Jaguars hinayhinay nang nakakita og kahayag ug mirehistro kini’g duha ka sunodsunod nga kadaugan.
Ang kadaugan sa Baby Jaguars gipangulohan ni Kendrick Abarquez pinaagi sa iyang 18 puntos ug 11 ka rebounds.
Nagkanayon si Abarquez nga ning-umento na ang ilang teamwork hinungdan sa maayo nilang gipakita sa miagi nilang duha ka mga duwa.
Bitbit ang 2-4 nga rekord, lisod nga dalan ang sagubangunon sa Baby Jaguars aron makasulod sa finals four.
Aduna na lang sila’y upat ka mga duwa nga nahabilin sa elimination round nga pulos krusyal sa ilang kampanya.
Gipasabot ni Abarquez nga masaligon silang makaapas pa sa biyahe paingon sa final four gumikan kay taas ang ilang moral isip kampiyon sa pre-season tournament nga mao ang Partner’s Cup.
Ang MVP sa Partner’s Cup nga si Kevin Guibao nidugang og 13 puntos alang sa Baby Jaguars samtang niamot og 10 puntos si Dilcer Gaviola.
Sa laing duwa, gipangkusokuso sa Sacred Heart School-Ateneo de Cebu (SHS-AdC) Magis Eagles ang University of Cebu Lapu-Lapu Mandaue (UCLM), 73-52.
Ang Magis Eagles ningsaka sa 4-1 nga rekord samtang natagak sa 0-6 nga baraha ang UCLM.
Gipangulohan ni Joey Villamayor ang Magis Eagles pinaagi sa iyang 14 puntos samtang niamot og 13 puntos si LA Casinillo. (ESL)