Unom ka buwan gikan sa pagsira sa naila nga Ala Boxing Club human sa 35 ka tuig nga mabulokon ug makasaysayong pag-operate, laing bag-ong boxing stable sa Sugbo ang natukod.
Gipanag-iya sa usa ka batan-ong negusyanti nga mahiligon usab sa natad sa paugnat sa kusog nga si Jason Arquizola, ang ARQ Boxing Stable maoy nahidugang sa mga boxing gym dinhi sa Sugbo nga mahimong usa sa mga dangpanan o modiskobre niadtong mga batan-on nga adunay igong abilidad ug katakos sa boxing.
Sa pagkakaron, ang maong boxing stable aduna nay pito ka bag-ong professional boxers nga ubos sa pagdumala sa managsuong boxing trainers nga sila si Eldo ug Joseph Cortes.
Sa kasamtangan, ang pito padayon nga nag-ensayo ug wala isalikway ni Eldo nga aduna pa unyay mga bag-o ug batan-ong recruits nga ilang kuhaon gikan sa amateur ranks.
Nangulo sa ARQ Boxing Stable si April Jay Abne kinsa wala pay pildi sulod sa lima ka away, John Paul Gabunilas (3-1, 2KOs), Berlan Robles, Ian Abne (1-0), Yerroge Gura, Zandro Librandor ug Niel Canete.
Ang maong gym anaa mahimutang sa Dike-1 Exoville, Basak-Pardo, dakbayan sa Sugbo.
Anaa man tuod sa alimpatakan ang pag-agak og usa ka boksidor nga mamahimong kampiyon ugma damlag, apan sayod si Arquisola nga dili kini mahimo sa dinalian ug sayon nga paagi.
Nagkinahanglan pa kini og hataas nga pasensiya, inubanan usab sa kakugi ug pagdisiplina sa mga boksidor.
Isip pasiuna, ang ARQ Boxing Stable naghan-ay na karon og usa ka bubble-type boxing promotions nga posibling sa uwahing bahin sa sunod buwan mapahigayon sa dakbayan sa Sugbo.
Si Arquisola mao usab ang tag-iya sa naila nga ARQ Builders basketball team nga sa makadaghan na makalangkat og kampiyonato sa mga local ug regional tournaments.
Sagad sa iyang mga magduduwa mga ex-PBA players sama nila ni Jojo Tangkay ug Reed Juntilla nga gikombinasyonan usab og mga beteranong basketbolista sa Sugbo sama nila ni Ferdinand Lusdoc, John Abad, Rheno Berame, Adrian Lao ug uban pa.
Ang ARQ Builders/Lapu-lapu City Heroes maoy usa sa mga kompirmadong mosalmot sa gipaabot nga Vismin Super Cup nga sugdan sa bulan sa Abril.