Mga duwa karon
3:00 pm- Phoenix batok Meralco
5:45 pm- TNT batok NLEX
Nakadesisyon ang San Miguel Beermen nga kuhaon si Devon Scott isip bag-o nilang import hulip kang Diamond Stone alang sa pagpadayon sa ilang kampanya sa Philippine Basketball Association (PBA) Commissioner’s Cup.
Kining maong lakang adunay kalambigitan sa pagkaangol sa tutonlan sa pambatong sentro sa Beermen nga si JuneMar Fajardo, kinsa taodtaod nga dili makaduwa.
Maayo ra man tuod ang gipakita ni Stone sa nag-unang tulo ka mga duwa sa Beermen apan nalantawan sa coaching staff nga dili siya epektibo kon wala si Fajardo, kinsa lumad nga taga lungsod sa Pinamungajan, Cebu.
Nanghinaot ang Beermen nga sa pag-abot ni Scott, kinsa 2016 undrafted sa National Basketball Association (NBA), hayan matul-id pagbalik ang dagan sa ilang kampanya.
Ang Beermen kasamtangang adunay 1-2 nga rekord sa mid-season conference.
Sa laing bahin, magsangka sa premirong duwa karong hapon, Oktubre 19, 2022, ang Phoenix Super LPG Fuel Masters batok Meralco Bolts samtang mag-abot sa main game ang TNT Tropang Giga ug NLEX Road Warriors.