Taas nga boltahe ang gipagawas sa Meralco Bolts aron pakirigon ang San Miguel Beermen, 111-97, sa Game 4 nga maoy nakatabla sa ilang semi-finals best-of-seven series, 2-2, sa 2022 Philippine Basketball Association (PBA) Philippine Cup sa Smart Araneta Coliseum kagahapon, Agusto 10, 2022.
Human sa ilang 96-91 nga kapildihan sa Game 3, ang Bolts naghugpong pagbalik aron korehian ang ilang mga sipyat ug ilaha kining gigamit ning sangkaa.
Pagsugod pa lang sa kombati, mihanoy na ang opensa sa Bolts ug nakaposte sila og 19 ka mga puntos nga labaw sa 2nd quarter.
Ninggukod ang Beermen ug gipahak nila ang dakong labaw sa Bolts ngadto sa lima na lang ka mga puntos.
Apan gipukaw sa Bolts ang ilang nahinanok nga opensa aron inaton pagbalik ang ilang labaw ngadto sa 19 puntos, 78-59, sa ulahing bahin sa 3rd quarter.
Ning-aksyon na sab unta paggukod og balik ang Beermen apan ning higayuna, adunay tubag ang Bolts sa pagpanghudlat sa 1989 Grandslam champion hangtod na sa katapusang gutlo.
Ning pagsuwat, padayon pang nagsangka ang TNT Tropang Giga ug Magnolia Chicken Timplados Hotshots sa main game sa Game 4 sa kaugalingon nilang semi-finals series.