Taodtaod na nga giplano ang panagharong sa Amerikanong mga boksidor nga sila si Errol Spence Jr. ug Terence Crawford apan hangtod karon, wala gihapoy katin-awan kon mahinayon na kini.
Si Spence maoy tag-iya sa World Boxing Association (WBA), World Boxing Council (WBC) ug International Boxing Federation (IBF) welterweight titles samtang si Crawford maoy naggunit sa World Boxing Organization (WBO) welterweight belt.
Niini pa lang, sayon ra unta ibaligya ug ihan-ay ang maong away hilabi na kay parehong interesado ang duha ka mga boksidor nga magbinukbokay.
Apan alang sa bantugang promoter nga si Bob Arum, lisod mahan-ay ang away tungod sa ka dako sa pundo nga kinahanglanon.
Matod ni Arum sa interbyu sa boxingscene.com nga adunay kabalaka ang mga mamohunan nga dili mokita ang away sa pay-per-view tungod sa internet piracy.
Gipasabot ni Arum nga ang boxing fans sa kalibutan maahat pagdagan sa internet piracy tungod sa kamahal sa presyo sa PPV sa mga away nga sama niini.