Naapil si Gilas Pilipinas naturalized Justin Brownlee sa All-Star Five sa FIBA Olympic Qualifying Tournament sa Riga, Latvia.
Gikauban ni Brownlee sila si Rihards Lomazs sa host Latvia, Jeremiah Hill sa Cameroon, Leo Meindl ug Bruno Caboclo sa Brazil. Si Caboclo maoy napiling MVP sa kompetisyon.
Ang pasidungog maoy labing unang naangkon ni Brownlee isip sakop sa Gilas.
Si Brownlee, kinsa usa ka three-time Best Import awardee sa Philippine Basketball Association (PBA) ubos sa kampo sa Brgy. Ginebra Gin Kings, nag-average og tournament high 23 puntos, 8.3 ka rebounds, ug 6.3 ka assists sa OQT.
Sa makapaukyab nga kadaugan sa Gilas batok sa Latvia, 89-80, si Brownlee nimugna og 26 puntos.
Gisundan kini niya og 28 puntos sa kapildihan sa Gilas batok sa Georgia, 96-94.
Sa kapildihan sa Gilas batok sa Brazil, 71-60, sa semi-finals, si Brownlee nalimitahan lang og 15 puntos.
Human sa OQT, si Brownlee moduwa pagbalik sa Ginebra alang sa PBA 49th Season Governors’ Cup. / ESL