Gihulagway ni San Miguel sports director Al Francis Chua nga perpekto ang kapabilidad ni Justin Brownlee isip naturalized player sa Gilas Pilipinas.
Alang ni Chua, mao kini ang dakong hinungdan nga nahimong bayani ang resident import sa Brgy. Ginebra Gin Kings sa dakong kalampusan sa Gilas sa bag-uhay lang nahuman nga 19th Asian Games sa Hangzhou, China.
Gipasabot ni Chua nga adunay kapabilidad si Brownlee nga mapagawas ang labing maayong abilidad sa iyang mga kauban ug usa kini ka instrumento nga nakabaton pagbalik ang Pilipinas og basketball gold medal sa Asian Games human sa 61 ka mga tuig.
“Justin, he is not only a good player, si Justin kaya niyang pagalingin ‘yung teammates niya kasi namamasa,” batbat ni Chua nga napatik sa Spin.ph.
“He is a team player. He understands basketball. Alam niya kung kailan siya su-shoot.”
Napakita kini Brownlee sa mga duwa sa Gilas sa Asian Games hilabi na dihang ilang nabuntog ang grabe ka inilog nga host China, 77-76, sa semi-finals.
Ning duwaa, nakabangon ang Gilas sa 20 puntos nga pagkalubong sa pagpangulo ni Brownlee, kinsa maoy nakapasulod sa nakapadaog nga three-pointer sa nahabiling 23.3 ka mga segundos.
Igo lang unta nakamugna og unom ka mga puntos si Brownlee sa halftime apan pagkahuman sa duwa, nakapupo na kini og 33 puntos.
Nagpadayon ang maayong duwa ni Bronwlee hangtod na sa gold medal game diin gipanglupig sa Gilas ang Jordan, 70-60.
“Tignan niyo sa China. ‘Teka muna, ako na ‘to’ pero hindi mo kilala na tira ng tira,” pasabot ni Chua. “Nilagay na nila hindi na [Justin] Noypi. Justin for President na nilalagay ng ibang tao. Sa pagmamahal lang naman nila ‘yun kay Justin.”