Nakaipsot ang Milwaukee Bucks sa kamot sa Boston Celtics, 103-101, sa Game 3 sa National Basketball Association (NBA) Eastern Conference semifinals kagahapon didto sa Milwaukee.
Ang two-time MVP Giannis Antetokounmpo maoy nangulo sa Bucks ngadto sa kadaogan pinaagi sa 42 puntos lakip na ang go-ahead basket sa nahabiling 44.3 segundos sa duwa.
Tungod sa kadaogan, naglabaw na ang Bucks, 2-1, sa ilang best-of-seven series. Ang Game 4 duwaon gihapon sa balwarte sa Bucks karong Martes (PH time).
Si Antetokounmpo milangkat pud 12 ka rebounds ug adunay walo ka assists.
Kulbahinam ang katapusan nga bahin sa duwa diin gi-review pa sa officials pinaagi sa replay ang itsa ni Al Horford sa Boston Celtics nga mao untay motabla sa duwa.
Naggukod ang Boston 103-100 dihang na-foul ni Jrue Holiday si Marcus Smart sa nahabiling 4.6 segundos sa three-point line. Gitawagan kini’g non-shooting foul nga adunay duha ka free throws, imbis tulo ka itsa kon shooting foul kini.
Gipasulod ni Smart ang unang free throw ug gituyo pagsipyat ang ikaduha, nakuha ni Smart ang rebound apan nasipyat siya sa putback attempt.
Nahatagan pa og laing higayon ang Celtics kay natapik man ni Robert Williams ang bola nga miresulta sa putback attempt ni Horford, sipyat ang maong itsa. Wa mohunong si Horford og naka putback kini sa ikaduhang higayon, apan napupos na ang oras og not-counted na ang maong tira.
Mitunol og 25 puntos si Holiday alang sa Milwaukee. Si Jaylen Brown maoy nangulo sa Boston sa iyang 27 puntos ug 12 rebounds, samtang midugang of 22 puntos ug 16 ka rebounds si Horford.
"I saw Al (Horford) tip it, and I saw the red outline go off on the backboard," batbat sa Bucks center Brook Lopez. “It was very close.”
WARRIORS 142, GRIZZLIES 112
Sa laing bahin, pirteng humoka na sa Memphis Grizzlies human sila lat-an sa Golden State Warriors, 142-112, sa Game 3 sa Western Conference semifinals.
Ang Splash Brothers Stephen Curry ug Klay Thompson maoy misalida pagmaayo sa maong duwa aron hatagan og labaw ang Warriors, 2-1, sa best-of-seven series.
Si Curry mipakatap og 30 puntos samtang si Thompson adunay 21 puntos ubanan sa siyam ka rebounds.
Ang pambato sa Memphis Ja Morant nakahatag og labaw sa iyang team 64-57 sa halftime. Apan wa kini makakuha og saktong tabang sa second half.
Sa nahabiling 6:19 sa duwa, migawas si Morant nga gakiang padulong sa locker room.
Ang Game 4 duwaon karong Martes (PH time) didto sa Chase Center sa San Francisco, California.