KON hisgutan ang three-point shooting sa Philippine basketball, numero unong motatak sa alimpatakan sa mga Pinoy mao si Allan Caidic.
Apan ang gitawag og ‘Triggerman’ sa Philippine Basketball Association (PBA) dili maoy naggunit sa rekord sa labing daghang napasulod nga three-point shots sa usa ka duwa sa kasaysayan sa mayorihiyang mga liga sa Philippine basketball.
Ang naggunit ning maong rekord mao si Felix Duhig, produkto sa Cebu Institute of Technology (CIT) Wildcats.
Sa usa sa mga duwa sa Wildcats sa nabungkag nga Cebu Amateur Athletic Association (CAAA) niadtong 1990, si Duhig nagpakatap og 112 puntos lakip na niini ang 30 ka three-point shots.
Ang labing daghang three-point shots nga napasulod ni Caidic sa usa ka duwa miabot lang og 17. Niadtong duwaa, nagpakatap siya og 79 puntos. (ESL)