Gipadayag ni Allan Caidic, usa sa gikonsiderar nga labing hinigo sa kasaysayan sa Philippine basketball, ang iyang kagul-anan sa matag higayon nga mapakyas ang Gilas Pilipinas.
Adunay mga nanghinaot nga aduna unta’y shooters ang Gilas nga sama og kalibre ni Caidic, ang gitawag og Triggerman sa Philippine Basketball Association (PBA).
Sa bag-uhay lang nahuman nga 2023 FIBA Basketball World Cup, ang Gilas igo lang nitali og 39-of-133 three-point shooting sulod sa lima ka mga duwa diin usa ra ang ilang nahagpat nga kadaugan.
Igo na lang sa pagpahiyom si Caidic dihang gipangutana sa Spin.ph kabahin sa ubos kaayo nga three-point shooting percentage.
Hinuon gipasabot ni Caidic nga dili makiangayon kon ikumpara ang kasamtangang shooters sa Gilas ngadto kaniya.
“Noon kasing panahon ko sa national team, plays were called for me. Sine-set up ako so I can get a good look at the basket, to put me in a position to make the shot,” matod ni Caidic, kinsa kanhi PBA MVP ug miyembro sa PBA 25 Greatest Players.
“So ako, alam ko kung kailan ako titira, at handang-handa ako. That is so unlike Gilas’ shooters,” Caidic.
Gipasabot ni Caidic nga sa iyang nabantayan, daw dili andam ang shooters sa kasamtangang Gilas ug dinalian na ang pag-itsa niini sa gawas partikyular sa three-point area.
“Ngayon, depende kung malibre sila, then they take the shot. So mahirap. Parang emergency situations lang. So you’re not ready to shoot,” pasabot ni Caidic.
Kabahin sa kampanya sa Gilas sa 19th Asian Games, nga sugdan karong Septiyembre 23, 2023 sa Hangzhuo, China, igo na lang sa panghinaot si Caidic nga unta aduna pa’y dugang shooters ang puwersa sa Gilas.
Iyang nahisgutan ang sama og kalidad nila ni Matthew Wright, Marcio Lassiter, Jordan Heading ug Robert Bolick. / ESL