Gilaumang makasugat og malisod nga kombati ang Gilas Pilipinas sa ilang pagpakigsangka sa host Cambodia ning Huwebes, Mayo 11, 2023, alas 6:00 sa gabii (PH time) sa 32nd Southeast Asian Games men’s basketball event sa Morodok Techo Stadium sa Phnom Penh, Cambodia.
Ang duha ka mga kampo parehong nasubhan og dagkong kadaugan, timailhan sa ilang kaandam nga molabni sa kampyunato.
Ang Gilas Pilipinas ningmakmak sa Malaysia, 94-89, niadtong Martes, Mayo 9, 2023, samtang mao sab kini ang gibuhat sa Cambodia ngadto sa Singapore, 85-60, niadtong Miyerkules, Mayo 10, 2023.
Ang Cambodia adunay unom ka naturalized players lakip na niini sila si Sayeed Pridgett, Darrin Dorsey, ug Brando Peterson, nga maoy naghatag sa host country og gold medal sa 3x3 basketball event.
Ang ubang naturalized players sa Cambodia mao sila si Oscar Lopes, Dwayne Morgan, ug 6-foot-9 center Darius Henderson.
“They are a tough team. You saw the three guys in the 3x3. They have another three. They have like six naturalized players. They are going to be a handful,” matod ni Gilas coach Chot Reyes nga napatik sa www.pba.ph.
“We have to be able to adjust and pivot during the game. We have very little knowledge about their games as a team.” (ESL)