Ang Serbia nagsalig sa ilang kaabtik sa pag-iskor aron pukanon ug pakagingon ang paborito sa torneyo nga Canada, 95-86, sa knockout semifinals sa 2023 FIBA World Cup sa Biyernes, Septiyembre 8, sa Mall of Asia Arena sa Pasay City.
Ang gunner sa Atlanta Hawks nga si Bogdan Bogdanovic maoy nangulo sa nagdilaab nga opensa sa mga Serbian pinaagi sa iyang team-high 23 puntos sa 8-of-12 shooting nga gibuwakan sa tulo ka triples.
Ang big man nga si Nikola Milutinov ug ang shooting guard nga si Ognjen Dobric ning-iskor og 16 puntos matag usa alang sa Serbia, nga nipabuto og 62 porsyento gikan sa floor batok sa Canada.
Naglabaw sab ang Serbia sa rebounding department, 33-22.
Ang Serbians nakaabot sa final round sa unang higayon sukad niadtong 2014 nga edisyon sa Seville, Spain.
Ang Serbia makigsangka sa mananaug sa USA-Germany semis nga giduwa pa sa pagsuwat ning taho.
Ang Canada makigtigi alang sa bronze medal batok sa mapildi sa duwa sa USA-Germany.
Gipangulohan ni RJ Barrett ang Canada nga adunay 23 puntos, si Dillon Brooks adunay 16, samtang si Shai Gilgeous-Alexander miiskor og 15 ug siyam ka assists. (REV)