Magpinaksitay sa finals ang Cleveland Cavaliers ug Houston Rockets human nila gipangpukan ang ilang tagsa-tagsa ka kontra ning Lunes, Hulyo 17, 2023 (PH time) sa 2023 National Basketball Association (NBA) Summer League sa Las Vegas, USA.
Sa pagpangulo ni Isaiah Mobley, ang Cavaliers ningbuntog sa Brooklyn Nets pinaagi sa overtime, 102-99.
Si Mobley, kinsa usa ka second round pick sa Cavaliers niadtong 2022, nagpakatap og 23 puntos lakip na niini ang nakapadaog nga puntos.
Sa ilang bahin, yanong gipangmakmak sa Rockets ang Utah Jazz, 115-101.
Ang Cavaliers ug Rockets ningsulod sa finals nga parehong wala’y pilde sulod sa lima ka mga duwa.
Sa laing mga duwa, ningdaog ang Philadelphia 76ers batok sa New Orleans Pelicans, 117-114, Detroit Pistons batok sa Indiana Pacers, 100-85, San Antonio Spurs batok sa Oklahoma City Thunder, 98-94, ug Miami Heat batok sa Portland Trail Blazers, 104-78. (AP)