Adunay bag-ong boksidor sa Sugbo nga gilaumang makahimo og marka sa kalibutan sa boksing sa ugma damlag.
Gitumbok mao si Jan Kevien Jimenez, nga gidumala ni Cebu sportsman Lorenzo “Chao” Sy.
Si Jimenez, 19, mopakita sa iyang potensyal nga abilidad batok kang Ariel Antonio sa Lucena City sa main event sa boxing promotion nga pasiugdahan sa Chao Sy Productions ug Prime Stags Sports Promotions karong Hunyo 30, 2023 sa Talisay City Sports Complex sa Brgy. Poblacion, siyudad sa Talisay, Cebu.
Gipasalig sa Palarong Pambansa VisMin Cup gold medalist nga buhaton niya ang tanan aron dili mausik ang pagdumala ni Sy ngadto kaniya.
“Ako ipasalig ni Sir Chao, ako ihatag ang tanan aron dili masayang ang iyang suporta nako,” matod ni Jimenez, kinsa adunay 3-0, 2KOs nga rekord.
Sa iyang bahin, si Sy miingon nga agakon niya og insakto si Jimenez aron mahimong world champion puhon.
“Dako kaayo ko og pagtuo nga ma-world champion siya. Dako ang iyang potential,” matod ni Sy. (ESL)