MOHUNAT ang kombati alang sa garbo sa mga tunghaan sa natad sa paugnat sa kusog sa pagsugod sa Cebu Schools Athletic Foundation Inc. (CESAFI) men’s basketball karong Agusto 31, 2019 sa Cebu Coliseum.
Sama sa naandan, ipahigayon ang grandiyusong opening program sugod sa ala 1:00 ang takna sa hapon sa dili pa ang aktuwal nga kompetisyon.
Human sa programa, magsangka ang Don Bosco Technological Center (DTBC) Greywolves batok Cebu Eastern College (CEC) Dragons sa premirong duwa alang sa high school division.
Mopsunod niini ang engkuwentro sa Cebu Institute of Technology-University (CIT-U) Wildcats ug University of San Jose-Recoletos (UJS-R) Jaguars alang sa college division.
Ang Greywolves ug Dragons parehong wala ningpakita og aksyon sa pre-season tournament nga mao ang Partner’s Cup diin naghari ang University of San Jose Recoletos (USJ-R) Baby Jaguars.
Gumikan kay wala’y nasayod kon unsa’y ilang ikabuga ning tuiga, posibleng makahatag og surpresa ang Greywolves ug Dragons hilabi na ngadto sa sayong mga inilog nga mao ang Baby Jaguars, Sacred Heart School-Ateneo de Cebu (SHS-AdC) Magis Eagles, defending regular-season champion University of Cebu (UC) Junior Webmasters ug multi-titled University of the Visayas (UV) Baby Green Lancers.
Apan labing seguro, dili sab magpabitin ang Southwestern University (SWU-Phinma) Baby Cobras, University of San Carlos (USC) Baby Warriors, University of Southern Philippines Foundation (USP-F) Baby Panthers ug CIT-U Wildkittens.
Ning tuiga, adunay bag-ong sakop ang high school division nga mao ang UC-Lapu-Lapu Mandaue (UCLM) campus.
Sa college division, gilauman nga makasinati og malisod nga pagsuway ang defending champion UV Green Lancers sa ilang tinguha nga makadepensa sa ilang korona.
Basi sa mga aksyon sa pre-season, ang ubang teams ningpakita og senyales nga aduna sila’y ikabuga sa pagpukan sa Green Lancers hilabi na ang pre-season champion SWU Cobras.
Ang Cobras mingbutlog sa Green Lancers, 2-0, sa best-of-three championship series sa pre-season.
Ang UC Webmasters lakip na ang USC Warriors ug USJ-R Jaguars pulos sab nakitaan og dakong potensyal.
Ang CITU Wildcats ug University of Southern Philippines Foundation (USPF) Panthers gilaumang dili sab bastabasta magpalupig ning tuiga. (ESL)