MIPASALIG ang Cleveland Cavaliers nga mobawos sa defending champions Golden Statew Warriors sa ilang panagharong og balik sa Game 2 sa National Basketball Association (NBA) Finals nga ipahigayon ugma (RP time) sa balwarte gihapon sa Oracle Arena sa Oakland.
Gipabuhagay sa Cavaliers nga ang ilang overtime nga kapildihan sa Game 1 sa best-of-seven series, 114-124, usa ka resulta sa ‘pagpangawat’ apan gipasabot ni coach Tyronne Lue, ilaha na kining gipadaplin ug nakatutok na lang sila sa pagpadayon sa series.
“We lost a tough game,” matod ni Lue. “We can’t dwell on that. We can’t live on that or we won’t be able to perform in game two. So we have to get on with it.”
Giklaro ni Lue nga taliwala niini, wala ra matay-og ang ilang pagsalig ug kadasig nga mailog ra gihapon nila ang titulo gikan sa Warriors.
“Listen, we’re not broken. We lost a game. It was a tough game for us. The guys’ confidence is not shaken. We have the blueprint. Now we have to execute at a higher level,” dugang ni Lue.
Si Cavaliers guard George Hill, kinsa wala makatulog gumikan sa iyang sipyat sa freethrow line nga posible untang makapadaog kanila, nabalikan na sab sa iyang kadasig ug nagpanikad nang makabawi.
“We can win this series playing the right way. Everyone in this locker room felt we gave one away but we have a game on Sunday to make up for it and get back on the right track,” asoy ni Hill.
“None of us is demoralized. We’re going to bottle up all that frustration from game one and bring it out for game two.”
Si Cleveland superstar LeBron James nagpakatao og playoff career-high nga 51 puntos 51 points nga nakawang lang tungod sa krusyal nilang kasaypanan sa himatyong segundos sa regulation period.
“He did everything he could to will our team to win,” asoy ni Lue kabahin kang James.
Sa pangutana kon sa iyang tan-aw aduna pa’y mas grabeng ikabuga si James, si Lue mitubag: “I hope so. I know it’s asking a lot but he needs to lead by example. He needs to keep it up.”
Ang Warriors nagtuo nga mas magbangis si James sa Game 2 ug mao kini ang ilang gipangandaman.
Tinguha ni Warriors coach Steve Kerr nga mas pahugtan pa nila ang ilang depensa ngadto sa four-time MVP, kinsa gikonsiderar nga hari sa basketball sa kalibutan.
“Overall we did not do a good job on LeBron. He got to spots he wanted to. It’s a team-wide focus and aggression that needs to change,” matod ni Kerr.
“I didn’t think we got him out of any sort of comfort zone and we’ve got to do a better job of that on Sunday.”
Ang usa sa mga pambato sa Warriors nga si Klay Thompson nagkanayon nga bisan unsa pa’y ipagawas nga kombati sa Cavaliers, wala sila’y angayang ikabalaka basta dili lang maguba ang ilang duwa.
Si Thompson nakasinati og angol sa iyang wa nga tiil sa sayong bahin sa Game 1 apan mipasalig kining antuson niya ang tanang sakit aron makatabang sa Warriors.
Ang laing starter sa Warriors nga si Andre Iguodala nagpabiling kuwestiyunableng makaduwa ning higayuna.
Wala makaduwa si Iguodala sa miaging upat ka mga duwa sa Warriors gumikan sa angol sa iyang tiil. (AP, ESL)