NADEPENSAAN sa ARQ Builders/Far Eastern University (FEU) Tamaraws sa Manila ang ilang korona pinaagi sa pagsungag sa Cebu suad Vincare Pharma/Southwestern University (SWU) Phinma Cobras, 84-61, sa miaging gabii sa finals sa Bayugan City Mayor’s Cup Invitational Basketball Tournament sa Lope Asis Memorial Gymnasium.
Ang Tamaraws nakaipsot sa pagpanghudlat sa Cobras sa nag-unang tulo ka quarters pinaagi sa makabungog nga 25-7 run sa 4th quarter.
Nakakombati pa’g insakto ang Cobras sa 3rd quarter pinaagi sa gipauwan nga three-point bombs nila ni import Lamine Thiam ug guard Shaquille Imperial.
Apan sa 4th quarter, gigamit sa Tamaraws ang ilang opensa ug depensa aron paglubong sa Cobras.
Ang Tamaraws nakabulsa og P200,000 isip kampiyon, nakakuha og P150,000 ang Cobras.
Ang laing team sa Cebu nga mao ang Mair Construction/University of Cebu (UC) Webmasters nakabaton og P100,000 human naangkon niini ang ikatulong dapit. (ESL)