Taliwala sa iyang pangidaron, determinado gihapon si Filipino boxing icon Manny Pacquiao nga tumanon ang dugay na niyang pangandoy nga makatunol og Olympic gold medal sa Pilipinas.
Sa sayo pa, gipasabot ni Pacquiao nga mao na kini ang iyang pangandoy sukad sa iyang pagkabata apan ang kalisod sa kinabuhi maoy nagtukmod kaniya aron manimpalad sa professional rank.
Alang ni Pacquiao, kinsa mag-45 anyos na karong Disyembre, 2023, dili pa ulahi ang tanan.
“I believe that it is not too late to fulfill my dream of bringing home a boxing gold medal from the Olympics for the Philippines,” pamahayag ni Pacquiao.
Dako ang pasalamat sa Pambansang Kamao ng Pilipinas nga gitabangan siya sa Philippine Olympic Committee (POC) alang sa iyang tinguha nga makaaway sa 2024 Paris Olympics.
Ning bag-uhay lang, nagpadala na og suwat hangyo ang POC ngadto sa International Olympic Committee (IOC) kabahin sa hangyo sa kanhi 8-division world champion.
Naghuwat na lang ang POC sa tubag sa IOC.
Gitataw ni Pacquiao nga dili babag ang pangidaron sa iyang tinguha nga makab-ot ang iyang pangandoy.
“I am grateful to the Philippine Olympic Committee under the leadership of Abraham Tolentino for making a recommendation to the IOC to process my eligibility to compete in the 2024 Paris Olympic games,” pamahayag ni Pacquiao.
“I believe that age is not a barrier to fulfill our dreams. A clear heart and mind always finds its way to realize our dreams.”