WA MAN nagmalampuson si Cebuana skateboarder Margielyn Didal sa pagsungkit og medalya sa Tokyo Olympics alang sa Pilipinas apan nagmadaugon gihapon kini sa kasingkasing sa iyang fans.
Daghan ang nakadayeg sa gipakitang pagkamalipayon sa 22 anyos nga Cebuana atol sa kompetisyon sa Ariake Urban Sports Park niadtong Dominggo, Hulyo 25, 2021.
Daghang fans ang nakadayeg sa lumad nga taga Lahug, Cebu City sa iyang “positive vibes” ug “positive energy” sa kompetisyon nga nabantayan nang daan sa pagsugod pa lang sa dakong sporting event sa kalibutan.
Ang iyang mga hulagway sa opisyal nga accounts sa Tokyo 2020 ug Olympics page sa Instagram, Facebook ug Twitter nakaaangkon sab og libuan ka mga reaksyon ug pag-abiba gikan sa fans.
Sa kompetisyon, mabantayan ang kasuod si Didal sa iyang kaatbang gikan sa Brazil nga mao ang 13 anyos nga si Rayssa Leal, kinsa misungit sa silver medal.
Sa wa pa ang final round, ang duha naghimo pa og Tiktok video nga gi-upload ni Didal human nidaog si Leal.
“@jrayssaleal Congrats on getting Silver in the first Olympic,” caption ni Didal sa iyang video sa Tiktok nga nakaankon na og 1.6 million likes, kapin sa 21,000 comments ug 18 ka shares.
Nitapos sa kompetisyon si Didal nga Top 7.
Gidayeg sa Brazilian fans si Didal tungod sa iyang charisma ug pagsuporta ni Leal. Nahimong online sensation si Didal sa Brazil.
Daghang Brazilians ang nidumog og pagsuporta kaniya ilabi na sa iyang Instagram ug Tiktok accounts. Trending topic sab siya sa Twitter sa nasud.
Tungod niini, na-feature sab siya sa dagkong media ug news outlets sa Brazil sama sa ESPN, O Globo, GQ Brasil ug uban pa.
Gani, sa iyang katapusang post sa Instagram, nakaangkon kini og halos 219,000 ka likes ug kapin sa 46,000 nga comments gikan sa fans diin kini halos napuno sa mga Brazilian flag emoji.
Base sa taho gikan sa O Globo, bisan ang bantugan mga artista sama ni Fernanda Paes Leme ug sikat nga personalities sa Brazil sama ni Camilla de Lucas, digital influencer ug Big Brother Brasil runner- up, nipadayag sab sa ilang pagdayeg ni Didal pinaagi sa pag-comment sa IG post niini.
Sa artikulo sa GQ Brasil, gihulagway si Didal nga “The athlete who stole the scene with her charisma during the competition.”
“Didal was already one of the great characters of the Tokyo Olympics because of her life story,” matod pa sa ESPN Brasil.
Sigun pa usa sa pinakadakong online media platform nga Oul nga daw gilumay ni Didal ang tanan sa iyang kamahigalaon ug pagkasimple.
Saysay sab sa laing online media nga Ofuxico nga ang panaghigalaay ni Didal ug Leal usa ka “gasa sa kompetisyon.”
Human sa kompetisyon, nag-viral sab ang tweet sa usa ka Brazilian nga si Bic Muller (@bicmuller), kinsa nanawagan og dinaliang Brazilian citizenship alang ni Didal.