SA pagbalik og duwa sa Cebu City Sharks sa Maharlika Pilipinas Basketball League (MPBL) Datu Cup gikan sa bakasyon sa Pasko ug Bag-ong Tuig, aduna kini i-ugbok nga bag-ong haligi sa ilang puwersa.
Gitumbok mao ang usa sa mga sinaligan sa 2018 Cebu Schools Athletic Foundation Inc. (CESAFI) 1st runner-up University of San Jose Recoletos (USJ-R) Jaguars nga si Ralph Dinolan.
Si Dinolan mopakita na og aksyon karong Enero 12 sa pag-asdang sa Sharks sa balwarte sa Pampanga Lanterns sa Angeles University Foundation gym.
Nagkanayon si Sharks coach Norberto “Titing” Manalili nga nagsugod na’g praktis si Dinolan sa Sharks niadtong Disyembre 27 sa miaging tuig ug malaumon siya nga makatabang kini sa ilang kampanya ning krusyal nga bahin sa torneyo.
Matod ni Manalili, kinsa kanhi coach sa Jaguars, nga dali ra’ng naka-adjust si Dinolan sa ilang sestima hinungdan nga dako ang iyang pagtuo nga makatabang dayon kini kanila.
“Nagsige pa siya’g adjust sa atong system dinhi pero makuha ra man niya. Naa pa siya’y enough time and hopefully, ready na siya sa atong game against Pampanga,” matod ni Manalili.
Si Dinolan makig-uban og balik sa iyang kanhi kauban sa Jaguars nga si kanhi Cesafi MVP Jaybie Mantilla, kinsa dili pa lang sab dugay nga nasulod sa puwersa sa Sharks.
Ang Sharks aduna na la’y unom ka nahabiling mga duwa ug sa tan-aw ni Manalili, kon makalangkat sila’g upat ka mga daog gikan niini, hayan segurado na sila sa playoff.
“Ang ato lang gyud target kay makuha nato ang No.8 spot. Wa man gyud ta mag-expect og dako kay bati man ang atong pag-start sa tournament pero karon naa ta’y nindot nga chance nga maka-advance. Atoa gyud ning preparasyunan,” dugang ni Manalili.
Gibutyag sab ni Manalili nga padayon sab nga moduwa kanila ang usa sa ilang sinaligang bigman nga si Adrian Lao, kinsa nagpa-draft sa Philippine Basketball Association (PBA) ning bag-uhay lang.
Si Lao gipili sa NorthPort Batang Pier sa 3rd round sa PBA draft apan wala kini nakapirma og kontrata hinungdan nga nahibalik kini sa ilang puwersa. (ESL)