Gianunsyo sa World Boxing Council (WBC) nga nakatakda karong Hulyo 15, 2023 ang panagharong nila ni Nonito “Filipino Flash” Donaire ug Mexican Alexandro Santiago alang sa inilugay sa bakanteng WBC bantamweight title.
Nakuha kining maong impormasyon gikan sa boxingforum24.com.
Ang away ipahigayon sa Amerika apan sa wala pa matino nga venue.
Niadto pang Pebrero, 2023 gipahibalo sa WBC ang kabahin ning maong away apan ning bag-uhay lang kini na-eskedyul.
Nasayod nang daan si Donaire kabahin niini hinungdan nga padayon siyang nangandam bisan wala pa’y petsa.
Si Donaire, kinsa kanhi four-time world champion, taodtaod na sab nga nag-training dinhi sa Sugbo.
Sa usa ka interbyu sa Cebu media sa miaging buwan, gibutyag ni Donaire nga bisan sa iyang edad nga 40, grabe gihapon ang iyang kahinam nga daw usa pa lang siya ka bag-o nga boksidor.
Si Donaire adunay 42-7, 28KOs nga rekord samtang si Santiago, 27, naghupot og 27-3-5, 14 KOs nga baraha. (ESL)