Nagpaabot si Mexican Alexandro Santiago nga makasugat siya og malisod nga away batok kang Nonito “Filipino Flash” Donaire karong Dominggo, Hulyo 30, 2023 (PH time) sa Las Vegas, USA.
Ang away nahilakip sa undercard sa gikahinamang welterweight unification bout tali sa mga Amerikanong sila si Terence Crawford ug Errol Spence Jr.
Gipasabot ni Santiago nga bisan nag-edad na og 40 si Donaire, wala gihapon nibahar ang abilidad.
Sa tan-aw ni Santiago, delikado gihapon kaayo nga kontra ang kanhi five-division world champion hinungdan nga nangandam siya og insakto.
“Look, Nonito remains Nonito,” matod ni Santiago sa BoxingScene.com pinaagi sa translator.
“I’m not about to assume anything about an all-time great fighter like him. We’re preparing to face the absolute best version of him, and we are fully aware of what he’s capable of.”
Ilugan nila ni Santiago ug Donaire ang bakanteng World Boxing Council (WBC) bantamweight title.
Ang 27 anyos nga si Santiago naggunit og 27-3-5, 14KOs nga rekord samtang si Donaire adunay 42-7, 28 KOs nga baraha. (ESL)