MUNASGINHAWANG kadaugan pinaagi’s split decision ni Cotabato City native fighter “Ruthless” Romero Duno batok ni Mexican “Zurdo El Mozo” Juan Antonio Rodriguez sa ilang away nga gipahigayon sa Fantasy Springs Casino sa Indio, California, USA.
Si Duno, bag-ong WBO North American Boxing Organization (NABO) Lightweight Champion human ang duha sa tulo ka judges mipabor sa pinoy boxer.
Si Fernando Villarreal 85-84 para Rodriguez samtang sila si Daniel Sandoval 85-84 ug Eddie Hernandez 86-83 pulos mipabor ni Duno.
Mihaom ang prediction ni former world champion-turned trainer Rodel Mayol nga samang higayon trainer ni Duno nga nindot, kuyaw ug kulbahinam ang Duno-Rodriguez showdown.
Gituman ang game plan sa team Duno nga bulhot atake sa sinugdanan aron pakuratan ang kontrang slow starter Mexican, epektibo sa unang hugna pinaagi sa right overhand si Duno.
Sa second round patas patas duruha human nag bell to bell. Sa third round nakapabor si Rodriguez pinaagi’s combination dalang rapido sa right jab uban sa left hook and straight hinungdan nga miatras si Duno dihang gibati ang kaluya.
Agresibo sa fourth si Duno, gani nag bara-bara nasab ang duruha apan nalupig si Rodriguez pinaagi sa big right overhand nasab sa pinoy boxer, nagisi ang tuong mata sa Mexican gumikan sa headbutt. Sa ika-5 midominar ang Mexican.
Ang sixth round dili malalis nalupig ang pinoy sa nag-asu asong kumo ni Rodriguez. Sa seventh round one point deduction kang duno tungod sa low blow niya ngadto sa Mexican.
Gumikan sa deduction nag huramentado si Duno sa ika-8 nga hugna gamit ang left body shot ngadto sa kidney busa knocked down si Rodriguez.
Sa wala pa sugdi ang ika-9 nga round gi check sa ring physician ang gisi sa walang mata, gisi sa ilong ug tuo nga aping ni Rodriguez, gamit ang right overhand nasab ni Duno, nadakin-as ug naluya si Rodriguez, wala matiwas ang round nine sanglit giundang ni referee Raul Caiz Sr. ang away tungod nibuylo na pag-agas ang dugo sa samad ni Rodriguez sa headbutt.
Gibasehan ang scorecards pabor si Duno busa mitiyabaw kini dihang iyang ngalan ang gisulti sa ring announcer nga mananaug.
Gipasalamatan ni Duno ang tanang boxing fanatics sa boxing venue, mga pinoy nga mituyo pagsaksi apil na ang team Duno labina nga anaa sa ringside ang mga Big Boss sa Sanman Promotions Jim Claude Manangquil (chief executive officer) ug Dexter Tan (president).
Natuman ang saad ni Duno nga panimalos kang Rodriguez kinsa mi-KO niining tuiga ni pinoy San Diego based boxer Mercito Gesta.
Tungod sa kapildihan si Rodriguez midailos sa (30-8, 26KO) nga baraha samtang si Duno misaka sa (20-1, 15KO) nga fight record.
Samtang gawas kang Gesta gipahinungod usab ni Duno kining awaya sa iyang duha ka buwan nga baby girl Marie Duno, anak nila sa iyang hinigugma nga si Marimar Gumilao. (Daniel Quindao Guden, US Correspondent)