Durant, Irving nabaling sa Nets

HUMAN mipadayag ang All-Star nga si Kevin Durant nga mobiya siya sa Golden State Warriors aron motapon sa Brooklyn Nets kagahapon sa pag-abli sa free agency sa National Basketball Association (NBA), misunod sab dayon kaniya ang laing All-Star nga si Kyrie Irving.

Pinaagi sa Instagram page alang sa The Boardroom, gianunsyo ni Durant ang iyang desisyon.

Si Durant nakadaog og duha ka mga titulo niadtong 2017 ug 2018 sa iyang tulo ka mga tuig pagduwa sa Golden State una siya naangol sa playoffs ning tuiga diin nailog sa Toronto Raptors ang korona pinaagi sa pagbuntog sa Warriors, 4-2, sa finals series.

Gumikan sa iyang angol (ruptured right Achilles tendon), si Durant dili pa makaduwa sa sunod nga season apan bisan pa niini, andam gihangop gihapon siya sa Nets.

Gikataho sa ESPN nga miuyon si Durant nga mopirma sa Nets og upat ka mga tuig nga kontrata nga nagbalor og $164 million.

Puwede untang makakuha si Durant og lima ka mga tuig nga kontrata nga nagbalor og $221 million kon magpabilin siya sa Warriors apan wala kini niya gihimo.

Si Durant, kinsa usa ka 10-time All-Star, maoy nangulo sa scoring sa miaging playoffs pinaagi sa iyang average nga 34.2 puntos.

Wala pa masayri kon unsa na’y dinuwaan ni Durant inig kaalim sa iyang angol apan misugal ang Nets sa pagkuha kaniya sa tinguha nga mahimong usa ka lehitimong title contender.

Ang Nets adunay 42-40 nga rekord sa milabayng season apan natagak kini sa 1st round pa lang sa playoffs.

Hinuon dakong kalampusan ang ilang naangkon human nila nakuha si Durant diin ilang nalupig ang Warriors, New York Knicks ug Los Angeles Clippers.

Inig balik og duwa ni Durant, iya nang ikauban si Irving ug ang laing dekalidad nga magduduwa nga si De Andre Jordan, iyang mga kauban sa 2016 U.S. Olympic squad.

Sa iyang bahin, si Irving miuyon sa gitanyag nga kontrata sa Nets nga upat ka mga tuig ug nagbalor og $140 million.

Sa sayo pa, nipabuhagay si Irving nga nagplano siyang mopirma’g balik sa Boston Celtics apan nausab ang iyang hunahuna dihang miabot ang oportunidad nga magkauban sila ni Durant.

Si Irving nagdako sa New Jersey nga maoy kanhi pinuy-anan sa Nets una kini mitapon sa Brooklyn.

Si Jordan wala sab magmakuli nga mobiya sa New York Knicks aron motapon sa Nets ug makig-uban nila ni Durant ug Irving.

Gidawat ni Jordan ang tanyag sa Nets nga upat ka mga tuig nga kontrata nga nagbalor og $40 million. (AP, ESL)