GIPAHIBAWO ni Special Assistant to the President Bong Go nga gawas sa pagtan-aw ni Presidente Rodrigo Duterte sa away ni Senator Manny Pacquiao, makighimamat usab kini sa labing taas nga opisyal sa Malaysia.
Gipasabot ni Go mao si Prime Minister Mahathir Mohammad aron ilang hisgutan ang mga programa ug diplomasya sa duha ka nasod nga makaayo sa ilang tagsa ka mga lumolupyo.
Kini maoy labing unang pagpakighinabi ni Duterte sa prime minister sa Malaysia human iyang gipilde ang kanhi PM nga si Najib Razak atol sa ilang eleksyon sa niaging tuig.
Ang pagtan-aw ni Duterte sa away ni Pacquiao maoy labing una human siya nahimong labing taas nga opisyal sa Pilipinas.
Ang away ni Pacquiao ug Lucas Matthysse gikatakdang magsugod sa dili pa moabot ang kaudtohon diin suwayan og sakmit sa Pambansang Kamao ang WBA Welterweight belt sa Argentinian. (PAC)