Mipabaha og 33 puntos si Lucky Ecarma aron pangulohan ang Batch 2014 ngadto sa kulbahinam nga kadaugan batok sa Batch 2022, 73-70, sa nagpadayon nga Sacred Heart Ateneo Alumni Basketball Athletic Association (Shaabaa) Season 25 sa Miyerkules sa gabii sa SHS-AdC campus sa Barangay Canduman, dakbayan sa Mandaue.
Gawas sa 33 puntos, si Ecarma mipakita usab sa iyang dominasyon sa ilawom nga bahin pinaagi sa paglangkat og 16 ka rebounds ug ingon man aduna pa kini tulo ka assists.
Sa kadaugan, ang 2014 mao karon ang nag-una sa standings sa Division C nga may 2-0 nga baraha. Miabag kaniya sa opensa si Jair Adrei Igna kinsa mitali usab og 18 puntos ug walo ka rebounds.
Ang napukan nga Batch 2022 nakakuha og 25 puntos gikan ni Uriel Avila ug 13 usab ang natampo ni Aldrich Alvez.
Samtang yanong gidabo-dabohan sa Batch 2013 ang Batch 2021, 90-66, aron pagkutlo sa ilang unang daog sulod sa duha ka duwa.
Kon kahinumdoman, ang Batch 2013 napukan sa Batch 2014, 71-50, sa opening day niadtong Sabado apan mangtas kini nga mibalik sa korte aron mobangon gikan sa pagkapukan.
Si Rendell Senining mipaulbo og 33 puntos nga may 11 ka rebounds ug walo ka assists ug 20 usab ang nahimo ni AR-G Araw-araw nga gilamasan og lima ka assists.
Ang Batch 2021 girendahan ni Josiah Gideon Villamor nga may 22 puntos ug 14 ka rebounds.
Sa laing mga duwa, way kaluoyng gilubong sa Batch 2004 ang Batch 2009, 75-52, samtang gipatapsingan usab sa Batch 2003 ang Batch 2008, 89-76.
Kadto maoy unang daog sa 2004 sa duha ka duwa samtang nasugamak sa ilang ikaduhang sunodsunod nga kapildihan ang 2009 sa Division B.
Ang Batch 2003 aduna na usay 2-0 nga baraha ug 0-2 usab ang Batch 2008. (JBM)