ORMOC City, Leyte – Bisan og walay naitala nga kaso sa Coronavirus, apan ang lokal nga kagamhanan sa dakbayan sa Ormoc mikansela sa Eastern Visayas Regional Athletic Association (Evraa) Meet 2020.
Kini human gipaubos sa Department of Health (DOH) ang tibuok Pilipinas sa Code Red Level 1 tungod sa COVID-19 o Coronavirus. Si Ormoc City Mayor Richard Gomez mikansela usab sa ubang mga dagkong kalihukan sama sa zumba, motorcade ug ubang kalihukan sa International Women’s Month.
Ang Evraa 2020 gikatakda unta sa sunod buwan diin kapin sa 500 ka mga atleta ang ipadala gikan sa Ormoc. Kini ipahigayon sa lungsod sa Burauen, Leyte diin gilauman nga adunay liboan nga ka mga tinun-an gikan sa nagkadaiyang tunghaan sa Rehiyon 8 ang magtigi.
Apan ang DepEd mipagawas og kamanduan sa pagsuspenso sa tanan national ug regional meet activities.
Usa ka coach ang nahinabi sa Superbalita Cebu mibutyag nga posibleng sa Mayo o Hunyo na ang Evraa apan depende gihapon kini sa sitwasyon.
Si Presidente Rodrigo Duterte miisyu na Presidential Proclamation nga ipaubos sa State of National Health Emergency ang tibuok Pilipinas tungod sa Covid-19. (JKDP)