Ikaduhang Filipino-American niining bag-ong panahon ang nalakip sa USA Basketball ngadto sa 2023 Fiba Under-16 Americas Championship nga duwaon sa Yucatan, Mexico gikan sa Hunyo 6-12.
Siya mao si JJ Mandaquit, kinsa nakaduwa sa Fil Nation Select sa NBTC National Finals sa Marso dinhi sa nasod sa wala pa ang call-up.
Ang 6-foot-1 nga si Mandaquit, Fil-Am point guard gikan sa Honolulu, nagduwa sa high school sa Real Salt Lake Academy sa Utah.
Siya adunay tanyag karon nga moduwa alang sa NCAA Division I school sa Utah State.
Gi-report sa 247sports.com nga aduna usab siyay mga tanyag gikan sa Hawaii, Portland, Stanford, ug Washington State.
Si Mandaquit adunay impresibong kampanya sa NBTC diin iyang gitabangan ang Fil Nation nga makasulod sa finals sa wala pa sila moyukbo sa Nazareth School National University.
Si Mandaquit naapil sa Mythical Five uban nila ni Reinhard Jumamoy sa NU, Jared Bahay ug Raffy Celis sa Sacred Heart School-Ateneo de Cebu ug RJ Colonia sa NU.
Si Mandaquit ug ang Team USA nagtinguha nga maka slot sa Fiba Under-17 World Cup nga ipahigayon sa Hunyo 2024 sa Turkey.
Ang USA maoy niharos sa tanang pito ka mga edisyon sa Fiba U16 Americas Championship lakip na niadtong 2017 dihang nipakita og aksyon si Jalen Green nga usa ka Fil-Am.
Ang Houston Rockets cager nakaduwa sab sa NBTC sa wala pa siya napili isip second overall pick niadtong 2021. (PAC)