MAKIGBINUKBOKAY ang Pinoy nga boksidor nga si Mike Plania kang American Joshua Greer Jr. sa pagbalik sa aksyon sa boksing sa Las Vegas, USA karong adlawa, Miyerkules, Hunyo 17, 2020 (RP time).
Ang Top Rank Promotions nakahan-ay ning maong promosyon ubos sa superbisyon sa Nevada State Athletic Commission.
Wa’y gitugotang personal nga makatan-aw sa promosyon ug nagsunod ang Top Rank sa tanang mga lagda aron makalikay ang promosyon sa hulga sa coronavirus disease 2019 (Covid-19).
Kini maoy labing dakong away ni Plania sukad masukad diin ikaharong niya ang World Boxing Organization (WBO) No.1 bantamweight contender.
Si Plania, kinsa lumad nga taga General Santos City, naggunit og 23-1, 12KOs nga rekord samtang si Greer adunay 22-1, 12KOs nga baraha.
“Ito ‘yung laban na ine-expect ko sir nung bata pa ako. Minsan tinitingnan ko lang sa TV na balang araw makakalaban din ako diyan, ngayon sa awa ng Diyos sir nagkatotoo din,” matod ni Plania sa interbyu ni Ricah Trinidad sa “24 Oras.” TV program sa GMA 7.
Gipasabot ni Plania, kinsa gitawag og “Magic Mike,” dili sayon ang pagpangandam alang ning awaya gumikan kay gibuhat kini niya taliwala sa hulga sa Covid-19.
Wala siya naka-ensayo sa gym apan gitabangan siya sa kauban niyang mga boksidor aron maka-sparring.
“Maingat naman kami sa training sir kasi hindi kami lumalabas nung time ‘yun na medyo malakas pa ‘yung virus,” pasabot ni Plania. “Pasalamat ako sa Panginoon sir dahil binigyan ako ng talento na ganito saka mapakita ko sa buong mundo kung anong meron si Magic Mike.” (ESL)