MANILA - Anaa na man tuod nila ang dakong bintaha sa series apan alang ni Magnolia Hotshots coach Chito Victolero nga nagpabilin gihapong wa’y kaseguroan nga makaangkon sila og luna sa finals sa Philippine Basketball Association (PBA) Governor’s Cup.
“Sa akin na man, one game at a time. We keep thinking on how to win the game kasi nangyari na yan sa amin na ang 2-0 kami tapos natalo pa rin kami sa series. And we don’t want that it will happen again,” matod ni Victolero atol sa post-game interview human sa ilang ikaduhang daog, 101-97, niadtong Lunes sa Araneta Coliseum.
Sa maong duwa, gipahimuslan sa Magnolia ang pagkawagtang ni Ginebra Coach Tim Cone sa bench nga may oras pa nga 9:18 segundos sa fourth quarter human kini mapahamtangi og duha ka technical fouls tungod sa sobrang reklamo sa mga tawag sa referees.
Si Romeo Travis mipaulbo og 25 puntos alang sa Hotshots nga nakaposte og 12 puntos nga labaw samtang si Ian Sangalang mitali og 17.
Apan dili sayon ang pagpakigkombati sa Hotshots bisan pa man og wala si Cone. Sa mainiton nga panagkumboya nila ni LA Tenorio ug Justin Brownlee, ang Ginebra nakasikit sa mga himatyong minutos, 97-99.
Nisamot og kakulba ang habig sa Hotshots sa dihang nasipyat si Paul Lee sa iyang ikaduhang free throw nga may igo pang oras alang sa Ginebra.
Apan ang ilang tagtagsa ka mga itsa gikan sa three point area pulos lang misimhot sa ring nga maoy hingpit nga nagpupos sa ilang paglaom.
Karong gabii, Nobiyembre 14, suwayan sa Hotshot sa pagtapos ang series pinaagi sa pagpalagpot sa crowd-favorite Ginebra kinsa maoy no. 1 team human sa elimination round.
Ang duwa ipahigayon gihapon sa Araneta Coliseum nga sugdan sa alas siete sa gabii. JBM