NAGKAANAM na og kahayag ang gipangandoy nga rematch tali sa duha ka boxing legends nga sila si Manny Pacquiao ug Floyd Mayweather Jr.
Kini human nga gi-tag ni Mayweather ngadto sa iyang promotional company nga ipahibawo sa publiko nga andam na siyang mobalik og away.
Ning semanaha lang, mikatap ang video sa Instagram nga nagsugod na siya og ensayo ginamit ang double-end bag.
Sa nasayran, wala na makaaway ang 42 anyos nga Mayweather sukad sa iyang pagpakigsangka ni Andre Berto niadtong 2015.
Mao usab kining tuiga nga iyang napildi ang fighting senator pinaagi sa unanimous decision.
Hinuon si Mayweather nakasaka og balik ibabaw sa ring batok sa mga mixed martial arts fighters nga sila si Conor McGregor kinsa iyang gipaundang sulod sa 10 ka round, ug Tenshin Nasukawa nga yano ra usab kaayo niyang gi-knockout sa usa ka exhibition match.
Daghan ang nangagpas nga nanglantaw karon si Mayweather nga gustong moaway sa katapusang higayon, ug kini ang pagpakigsangka ni Pacquiao.
Nabantayan nga bisan pa sa iyang pangidaron, baskog pa gihapon kaayo si Mayweather. Kon sakto na unya sa praktis, way pagduda nga ang undefeated American fighter makahatag pa og saktong katakos batok ni Pacquiao.
Hinuon, ang upat ka tuig nga bakasyon ni Mayweather sa boxing maghatag og bintaha sa giilang Pambansang Kamao sa Pilipinas kinsa niadto lang Hulyo 20, mipildi sa batan-on ug kanhi undefeated world champion nga si Keith Thurman. (JBM, World Boxing News)