Wala pa’y plano nga moretiro si kanhi ONE lightweight champion Filipino Eduard “Landslide” Folayang apan niini pa lang ka sayo, tinguha na niyang makatabang sa pag-umol og batan-ong Pinoy nga mixed martial artists.
Tinguha ni Folayang nga iyang ipaambit ang iyang 16 ka mga tuig nga kasinatian isip MMA fighter sa iyang mga kababayang potensyal nga makasunod sa iyang lakang.
Ning maong plano, giporma ni Folayang ang Lions Nation MMA, nga bag-uhay lang gilusad.
Gipasabot ni Folayang nga sa iyang mga naabot, iyang responsibilidad nga ipaambit ang iyang mga nakat-unan aron magpadayon ang paglambo sa MMA sa Pilipinas.
Nanghinaot ang two-time ONE lightweight champion nga ang iyang legasya mahimong inspirasyon sa batan-ong MMA fighters sa nasod. (ESL)