Foreman nagmahay pagpili kang Ali

Nasipyat og pili ang kanhi world heavyweight champion nga si ‘Big’ George Foreman nga iyang gikontra bisan maguwang niya og pito ka tuig si Muhammad Ali niadtong 1974.

Dili unta mapatik sa resume’ ni Foreman si Ali ug kon kaya pa niya nga balikon ang milabay ug magsugod sa sinugdanan, limpyo unta ang record sa iyang boxing career.

Siya nibutyag nga nilikay siya sa mga delikadong boksidor sa iyang pagbalik sa boxing human niretiro sa unang higayon.

Ang walay pilde nga si Foreman kinsa adunay 40-0 uban sa 37 ka daug nga pulos gipakamang ang kontra (knockout) nipili kang Ali nga underdog sanglit edaran na ug adunay 42-2 win-lose record sa ilang away nga gitawag og “Rumble in the Jungle” 48 ka tuig na ang nakalabay.

Atol sa ilang away, si Ali nag-edad og 32 samtang si Foreman 25 anyos pa niadtong higayona.

Si Foreman ang nipakamang sa greatest rival ni Ali nga si Joe Frazier ug si Ken Norton nga pulos banggiitang boksidor sa ilang panahon diin sila gipilde ni Foreman.

Ang mga eksperto sa boksing nipili kang Foreman nga maoy modaog sa ilang away gumikan sa iyang impresibong kadaugan batok sa duha ka ngilngig nga mga boksidor.

Apan si Ali nigamit sa iyang taktika nga rope-a-dope aron pildehon si Foreman.

Sa maong paagi, naluya si Foreman ug sa 8th round, opisyal nga gianunsyo ang una niyang kapildehan sa iyang karera sa boksing gikan sa mga kamot ni Ali.

“Muhammad had my number. If I’d done it all over No Ali fight,” matod ni Foreman. (PAC)