GIBUTYAG ni Top Rank boss Bob Arum nga adunay madanihong tanyag aron ipahigayon ang gikaintapang heavyweight trilogy tali nila ni Tyson Fury ug Deontay Wilder sa Sydney, Australia sa bag-o niining Bankwest Stadium.
Ang gikasabot ni Arum mao si Dean Lonergan, kinsa maoy responsable sa pagpahigayon sa away nila ni Filipino boxing icon Manny Pacquiao ug Australian Jeff Horn sa Brisbane, Australia niadtong 2017.
Giangkon ni Lonergan nga gitanyagan niya si Arum alang sa Fury-Wilder III.
“I made a proposal to Bob about a month ago and we have been going back and forth ever since. The proposal was for a date in November or December," matod ni Lonergan nga napatik sa boxingscene.com.
Tinguha ni Arum nga dili siya mopahigayon pagbalik og dagkong mga away sama niini kon wala’y mga tumatan-aw.
Ning panahuna, ginadili pa ang mga kalihukan nga makapatapok og daghang mga tawo tungod sa padayong hulga sa coronavirus disease 2019 (Covid-19). (ESL)